كل يوم بالمحكمة

شو القصة بالزبط انا مش فاهم والله !!
هو كل واحد صار يمر من جنب المحكمة ويشوف حالو فاضي بفوت بشتكي علي؟! شو في شو في جد!!!
يا عمي طب في كتير شغلات المفروض انها اهم مني بحياتك!!
يا عمي التهي بولادك بمستقبلهم ، التهي ب ديزل التدفئة ، روح اسأل عن اداء ابنك بالرياضيات بالمدرسة !!
يا عمي العب كاندي كراش ، اطلع اسقي الزريعة اللي عباب البيت !! 
يعني بستغرب من اللي بسحب حالو وبعطل حالو وبنزل عالمدعي العام و بوقف عالدور و بكتب ورقة وشكوى وبدوّر عقلم و بجيب محامي وبدفع مصاري وبغلب حالو وبضيّع نص يومو مشااااان يشتكي عليي؟! طب ليش؟! لهالدرجة انا مدايقك؟! لهالدرجة مسببلك قلق بحياتك؟!
يا زلمة والله لو اني ناهب البلد و ثرواتها مهو هيك ، والله لو اني قاتلك قتيل !!
انا شو بعمل بالزبط؟! شو بكتب يعني؟! الحروف كلها هاي مهي طايره بالهوى ، ليش ماخدها لهالدرجة جد يعني!!

كل يومين والثاني رايح من مدعي عام ، وراجع من عند محامي ، ولك امي صارت تفهم بالقانون ، والقدح والذم والتشهير والبطيخ، طب شو اعمل ؟! يعني بالزبط شو في؟! ليش لهالدرجة مكبرين القصص وماخدين الحياة جد و ب نفسية هيك؟!

تركو الفساد ، وتركو السرقه ، و بلشوو ف عرضي انا ،، يا عمي هو فش غيري بكتب هالكلمتين؟!
صرنا عايشين ب رعب ، في عليك شكوى من فلان ، المدعي العام طالبك لإكمال اجراءات ابصر شو ، في عليك شكوى بالبحث الجنائي ، في عليك صرماية بوجهك !!

لا وكمان اذا ما حدا شكى عليي ، بحطوووو صورتي على شكووووووى مليش دخل ب امهااااا !!!!

كل الاحترام لمدعي عام عمان عبدالله بيك ابو الغنم لتفهمه الشكوى و تفهمه موضوع حرية الرأي والتعبير ، يا ريت كل الادعاء العام بالعالم زيك !!
والاحترام الثاني للمحامي علي علي الصليبي اللي تمرمط معي بكل الشكاوي!!
وكل الناس اللي وقفت معي بالمخافر والمحاكم والادعاء العام والسجون !!

‫#‏عمر_زوربا‬