صباح الخير يا جماعة الخير ..
بحزن عالموضه الجديده هالايام .. تبعت انو الإم بس تخلص طبيخ وتجهز الاكل .. لازم تصور الاكل كلوو .. من جميع الزوايا .. خصوصًا صحون اللبن .. صحون المخلل .. المعالق الجديدة .. المفرش تحت الاكل .. عطاولة السفره !!
بحسها بتقول لولادها :
محدااااش يمد ايدوووو عالأكل قبل مأصورو !!
اول صورة مش طالع فيها صحن اللبن
التانيه المعالق مش مرتبين فيها منيح
التالته الجاجة اللي عالرزّ مايله عاليمين!!
ولازم الصورة تبين فيها طرف الشاشه ال ٤٧ بوصة ( بالعقل ) ..
والولاد لازم يستنو تحميل الصور عالفيسبوك ،، وما يبلشو اكل الا لما الصورة تجيب ١٦ لايك !!
بحس الولاد ساعيتها بيصيرو يرنو ع صحابهم ( بعرررض خواتكو حطوو لايك عالصورة اللي نزلتها امي ) بدنااا نوووكل !!
غير هيك بتلاقيها كاتبه تحت الاكل .. بالانجليزي .. ستيك مع مارغاريتا ومارماريتا وشوكوفاتي تشوكولسوفاكيا !!
اي بعرض اختك ؟! الله يرحم ايام المجدرة وجنبها سلطة ( خيار ولبن ) !!
وفي منهم النغشات ،، اللي بتكتب تحت الاكله بالمصري ( شغل ايديااا ،، وحياة عينيااا )!
ولك عيووون ولادك اتفجرووو من الجوع !!
ولك حرام خلي الولاد يوكلو والله حرام !!
خلص يا ستي انتي معدّله .. انتي هايدرولك .. انتي منال العالم ( الله ) .. انتي توب شيف !! انتي منجا ،، انتي اناناس !!
بس حرام ولادك صفرنو من الجوع !!
طبعا بعد التصوير .. لازم يرجع الوضع الطبيعي .. المعالق الجداد بترجع عالخزانه ( للضيوف او لحماتها ) ،، المفرش بنشال وبنضب ( للعزايم ) .. وبرجع مكانو جرايد الوسيط .. اللبن برجع عالعلبة ( للعشا ) .. الاكل كلو بنشال عالارض ،، لانو طاولة السفرة اصلا للتُحف مش للأكل !!
بحس انو الأكل كلو بينضبّ .. وبتعمل لولادها سندويش زيت و زعتر ..!!
يلا اوك بيبي يلا نايتي باي مواه
#عمر_زوربا
تعليقات
إرسال تعليق