تفشيله !

زمان وانا واقف عباب مدرسة البنات ،، اجت احلى بنت عمستوى المدرسة ،، حتى عمستوى الدولة كلها ،، اجت قدام كل الشباب و اعطتني ورقه !! وحكتلي بالزبط : هاي إلك
انا يومها من الفرحة كنت بدي انشل شلل نصفي ،، صار معي رعشه بالعين اليمين ،، ورجلي الشمال تخدرت تخدير موضعي ..
حسيت كأني كنت بعرس ،، وقامت العروس عن اللوج من جنب عريسها ،، ومسكت الشوكة اللي فيها قطعة كيك ،، وطعمتني اياها ،، واجو اهل العريس طعنوني ١٦ طعنه في اجزاء مختلفه من الجسم .. ما علينا ،،،
الشباب اللي معي كلهم غاروو مني ،، ويقولو ولك من وين بتعرفها ؟؟! شكلها بتحبك ؟؟! اقرألنا الورقه !!!
انا بالحاله هاي عشت جو اللي مش فاهم ،، واللي شايف حالو .. واللي مش فارقه عندو ،، حتى حكتلهم : يا اخوان عادي شوفيها ؟! هسا اذا بدكو بمزع الورقه قبل م اقرأها .. الكل قال بصوت واحد : لا لا لا لا لا بشرفك خلينا نقراها ‏
اتجمعنا كلنا عالورقه ،، بالزبط زي شلة الشباب المراهقين الملمووومين حوالين شب معو فيديو +١٨ عربي ،، هدووء تام ،، ترتيب بالوقفه .. رؤوس مرتبه فوق الورقه .. الايدين عالكتاف زي الدبكة .. فتحت الورقه ،، كلام كتير مكتوب بخط سريع :
مرحبا .. انا سألت عن اسمك قالولي عمر زوربا ،، طبعا بديش اعلّق ع اسم العيله هلأ ..
اسفه بس بدي احكيلك كم شغله
انتا مش ملاحظ انو شكلك بضحك ؟! شو هاد اللبس اللي لابسو ؟! من وين سارق بنطلونك ؟! ليش مازع بنطلونك من تحت؟! وليش لابس قبه خنق والدنيا كتير شوب؟! وليش حاطت السنسال فوق البلوزه ؟! ولك انتا مين اللي بمشطلك؟! ولك انتا كتير بتضحك ؟! ولك انتا اهبل ؟! انتا ليش بتوقف اصلا عباب المدرسه؟! انتا متوقع انو في بنت رح تتفرج بخلقتك يا اطرم ؟! ولك انتا بتخزي ؟! ولك كل بنات الصف بضحكو عليك ؟! طب ليش حاطت سماعة بلوتوث ع دانك وانتا اصلا ما معك موبايل ؟! مين اللي مفهمك انك فايع ؟! بعدين من فتره شفت الشباب ملمومين حواليك وبترقصلهم اجنبي؟! والكل كان يضحك !! انتا ما كنت ترقص ،، انتا كنت زي اللي ماسك سلك كهربا ١٥ فاز ،، ولك استحي عحالك !! انتا ليش دايما عرقان ؟! وشو هاد الجنزير اللي لافو عند بنطلونك ؟! ولك انتا بتخزي ،، ولك روح انضب والتهي بدراستك بدل منتا مترمي عبواب المدارس ،، بعدين اللي كنت ماسكها امبارح مش وردة ،، مين مفهمك انها وردة !!! ولك هاي زهرة لوز اخضر !!! ولك تفووو عليك يا واطي ،، وشكرا ..
الشباب كلهم بتضحك ،، بعرفش ليش في واحد فيهم من كتر مضحك سلخني شلووت قوي ،، بس الشلوت هاد صحاني ،، وفي واحد فيهم اخد الرساله .. وانحطيت بموقف كتير زنخ .. و روحت عالبيت بالعقل ،، بعرفش ليش رحت نمت ،، وقعدت اسبوع بالبيت ..
ماشي يلا اوك باي
‫#‏عمر_زوربا