شخصية جديدة ومستفزة

تم بالآونه الاخيره استحداث شخصية جديدة غريبه ،،
هاي الشخصية اللي بتصحى ثاني يوم بتلاقي قالب ،، ومتغير ،، وابصر مالو ،، ما برد عمكالمه ،، ولا عمسج ،، ولا ع اي وسيلة ،، وبشوف رسائلك وما برد ، وعالواتس اب بشوف المسج بصحين زرق ،، بقرأ و بحلقلك!!

هسا لو يعمل هيك ويحكيلك السبب عادي ، هاد في حال يكون في سبب !!
بس في حالتو هاي لازم انتا تكتشف لحالك ليش قالب و زعلان ،، بدك ترجع بالتاريخ لآخر مره حكيت معو فيها ،، وتتذكر كل كلمة وكل حركة حكيتها ،، وتستنتج منها وين الاخطاء والعثرات والعثرينات تبعونك ،، ومن هبلك بتصير تفكر انو الكلمات اللي ما بتزعل زعلتو ، معقول زعل من هيك ،، لا لا لا ، لاا يمكن زعل من هيك !!

وبس تحضر ست سبع قصص تراجعو فيهم ،، بتصير تبعتلو ويشوف ويقرأ ، يا زلمه ليكون زعلان لما حكيت هيك؟! بقرأ و بردش !!
طب ليكون زعلت عشان حكيت هيك هيك ؟! برضو بقرأ و بطنش!!

هسا هون اصلاً اصلاً ما بكون في اشي ، بس انتا اصلا من هبلك ذكرتو بشغلات انتا حاكيها بتزعلش ، بس هو لأنو ما عندو سبب مقنع لقلابانو ، فهو بمسك بالحكي اللي انتا حكيتو ، وبتحجج فيه !!

مشان هيك صديقي العزيز ، صديقتي العزيزه ، اذا اكتشفت انو صاحبك زعلان هيك لحالو لبالو و ما برد ، حاول معو مره وحده بحكم الصحبه ، بس بما انك متأكد انك مش عامل اشي ، انسى وطنش وما تبعت ، رح يجيك لحالو ، بس يعيش طقوس و اجواء المزاج والتقلبات اللي بتصير معو !!

وبراهنك انو رح يرجع لما تطنشو ،،
اما اذا كتير بعتلو و حسستو انو كتير مهم ، رح يسوق فيها الشخصية الثقيله اللي اتركوني بليز اقعد مع حالي و انطوي !!

طوية اللي تطويك يا مفزلك يا كرنيب ،، احكيلنا شو مالك وسيبك من قصص التحاليل النفسيه و حياة عنكبوت الصحراء ،،
قال و بزعل اذا ما سألت ،، ولما تقولو رنيت عليك ، بقولك رانن خمس مرات؟! بس خمس مرات؟!
اي بالله عليك؟! يعني المفروض ارن عليك ١٥٠ مره يا مصطفى الاغا؟! المفروض انزلك بهليوكبتر عباب بيتك يا كريستوفر كولومبوس؟!

خلص يا حصتي والله الناس قرفانه حالها و ما حدا فاضي يحلل ويصالح ويستنتج ويخترع ويتواصل ،، خلص خليك بسيط و سلس وتكبرش مواضيع الحياه !! هو احنا ناقصنا؟! عيش الحياه الطبيعيه وانسى جو اللي بتتوحم ، خلص!!

‫#‏شخصيات_مستفزه‬
‫#‏عمر_زوربا‬