عمر زوربا يكتب ... الحب بدو مصاري

من بعيد لبعيد بتفرج عالزفه اللي فيها العريس بالسيارة الكشف ،، وقال شو صار يتخيل انو هو بدل العريس !! وصار يسب عليها بعقلو ، ويقول خاينه ، هيها تجوزت ، ولك خاينة شو؟! مهي كانت تترجاك ، اعمل اي اشي قبل ميجيها حدا ما تقدر تطلع في عيوب!!

طب هي شو دخلها؟! مهي استنتك اكتر من ٣ سنين!! شو تعملك اكتر من هيك؟! امها صبرت عليها كتير ،، وابوها مريض اصلا ونفسو يشوفها عروس ،، واخوانها صارو يشكّو فيها !!

هسا صرت ندمان و زعلان وحالف لتكسر وتخرب العرس!! شو بدك تعمل يعني؟! لو بدك تعمل كان عملت المستحيل مشان تتجوزها ، بلا هبل و روح خلص شوف حياتك،،

اااااه ، هسا بطلت بدك اشي من الدنيا ؟! اه بدكاش تشتغل وبدكاش الحياه!! وكلو منها؟! ليش هي شو دخلها؟! هسا بدك تحملها المسؤوليه!! عالحساب كنت تحبها؟! وكنت تقولها فش زيك!!

اقولك ، روح اعمل شو مبدك انتا حر ، بدك تخرب حياتك، خربها ، بس تخربش حياتها ، هي شو ذنبها ، نسيت قديش تحملت مشانك ؟! نسيت البهادل من امها ، نسيت كم مره تكسر موبايلها؟! نسيت كم مره تقول لامها الجمعه الجاي في شب جاي مع اهلو وانا موافقه عليه؟! و مر مليون جمعة ، وعالفاضي ! طب نسيت انها استنتك لما سافرت عالسعوديه سنتين ورجعت ايد من ورى وايد من قدام!! شو تعمل اكتر من هيك؟!

بعدين انتي تعالي هون ،، هو كمان شو كان المفروض يعمل؟! دفع دم قلبو وقلب اهلو عالدراسة ، ماضل ذهب لإمو ينباع للدراسة ، ماضل جمعية ،، كلو مشان يتخرج ، ويتوظف ويزبط وضعو!

اه هو وعدك بس يتوظف ليجي يخطبك ، بس م انتي شفتي متى توظف ، ولك حفي وهو يقدم عشغل ، ماضل شركة ومؤسسة ومحل الا قدم فيه ، عاف حالو شهرين وهو مندوب مبيعات ، وانطرد من بيوت وتسكر بوجهو مليون باب وهو مندوب!!

بعدين انتي ناسية انو بيتهم بالايجار؟! وابوه ميت ، وهو الكبير! واخوه توجيهي واختو بالمدرسة !! والوضع تعبان!!
شو كان لازم يعمل؟! يسرق؟! يترك اهلو؟! بترضيها؟!
اه سافر عالسعودية ، منتي شفتي راتبو وين كان يروح ، اجار بيت ومصروف ومليون قصة و اخوه كان بدو دروس خصوصي ، وكان واعد اختو يجيبلها اللي بدها ياه من السعودية ، مع هيك ماطلبت اشي،، امها كانت تقولها اوعي تطلبي من اخوكي اشي الله يعينو!
طب نسيتي انو امو صار بدها عمليه ، واخد سلفة ورجع من السعودية ، وحط المصاري وتداين فوقهم!!
ليكون بدك يترك امو مريضه ويجي يخطبك؟! انتي بترضيها؟!
وما زبط يرجع عالسعوديه وتوظف هون ب ٣٠٠ ليره!! شو بعملو هدول؟! انتي احسبيهم ! لا والله لتحسبيهم،،
حكالك مااا بزبط ماا بزبط ، بزبطش يخطبك بالديون ، شو يقول لأهلك؟! افرضي اهلك طلبو اشي هو مش قدو!! طب مين يدرس اخوه؟! مين مسؤول عن اختو؟!

م انتو زمان كنتو تحلمو بعرس حلو ، وسيارة كشف للزفة ، وبيت انتو تختارو عفشاتو ، مع كرسي هزّاز عند الشباك الكبير !!

طب مهو ما لقى شغل بتخصصو ، همه حكولو عن التخصص منيح ، ولما امو راحت معو عالجامعة ، حكولها بس يتخرج بشتغل ب الف ليرة ، وشافتو مبسوط على جو الجامعة ، وابن عمو بالجامعة وكان يغار منو ،، باعت الذهب اللي كانت بدها تعطيه لبنتها بس تتجوز ، وسجلتلو بالجامعة ،، وهو باس ايدها وحكالها والله يما لأعوضك بكل قرش وارجعلك كل ذهباتك واكتر !!
هي ما بدها اشي ، بدها ابنها يكون احسن الناس ، وما حدا يحكي عنو ما تعلّم ،، ليش هي الام بتسأل عن ذهب عشان ولادها؟!

ليش يحبك ويعلقك فيه؟! طب انتي ليش تحبيه كمان!! ليش اصلا تحبو بعض وتعيشو هالقصه؟! شايفه شو اخرتها؟!
انتي تجوزتي واحد اكبر منك ب ٢٠ سنة ، بس معو مصاري كتير!

ورح تسكني بالبيت الحلو والكبير ، والكرسي الهزّاز ،، وهيها السيارة الكشف بتستناكي عالباب لتطلعي ،،
بس بالله عليكي رح تكوني مبسوطة؟!
شو السيارة الكشف بدون حبيبك؟! والبيت الكبير رح يضل فاضي وعالفاضي بدونو ،، والكرسي رح يضل صافن ، بدون هزّ !!

- حبيبي ، بوعدك ما اخد غيرك لو بموت!
- ولك ليش هو انا رح اخليكي توخدي غيري !!

روح يا صاحبي شوف حياتك ،، تنساش انو عمك اللي بأميركا عندو بنت معها جنسية ، ونفسو يجوزك اياها قبل ميموت !
وانتي روحي كملي عرسك ،،
الحق مش عليك ، ولا عليها ، الحق عالوضع ، والحق عالبلد ، وعالحظ ، وعالنصيب ، وعلى اللي بصير ،،

الحب بزبطش هون ، الحب بدو مكان غير ، الحب ممنوع بالبلد ، الحب بدو مصاري!

‫#‏وافترقنا‬
‫#‏عمر_زوربا‬