هبه وعصام 2 | عمر زوربا | Omar Zorba

هبه عاجقة البيت من الصبح ، تعزيل ع تنظيف ع ترتيب ع تغيير اماكن ، غيّرت ملامح غرفة الضيوف كلها ، حطت الكنباية الكبيرة هناك عند الشباك قال احسن ، لأنو حماتها ( بتأرجل ) ، وتقعد عند الشباك احسن!!

مهو انا نسيت احكيلكم ، انو خطيب هبة ( عصام ) و امو و اختو عبير جايين اليوم عند اهل هبة ، هيك زيارة مع سهرة خفيفه ، مش عشا مش عشا ، يعني قعدة بطيخ وبزر و ارجيلة وجس نبض !!

فرح اخت هبة حلفت ما تساعد هبه ب اشي ، لانها متدايقه انها عزمتهم وهي عندها امتحان بكرا! وام هبة ما عندها مشكله ، اصلا ام هبة طلعت تجيب فواكة من الخضرجي ، موز عشوية تفاح مع كيوي ، وحبة اناناس ( ديكور ) تنحط عالطاولة ! لانو عيب الجماعه جايين اول مره بعد كتب الكتاب!

صار في شوية مشاكل بين هبة و فرح ، لانو هبة وهي بتعزل مشغلة المسجل ع اغنية ( نعناعة الجنينة لمحمد منير )
فرح اجت طفت المسجل ، هبة رجعت شغلتو!
فرح : هبة بدي ادرس ، بكرا عليي امتحان اهم منك ، ومن خطيبك ، وحماتك ، ومحمد منير تبعك!
هبة : انخرسي وروحي ع غرفتك ، انتي ليش غيرانه مني اه؟ ولا لأنو رأفت ما خطبك يا هبله 😂

- فرح خف عقلها ، لانها ذكرتها ب رأفت ، هاد رأفت قعد يحب فرح ٧ سنين ، بالاخر تجوز بنت خالتو اللي بكندا!

فرح دخلت ع غرفتها متدايقه ، و هبة رجعت شغلت المسجل ع اغنية ( مخادع و بايع وقلبك حجر ، ولا شفت زيك مبين البشر )
فرح سمعت الاغنية من جوى وتذكرت رأفت ، وانتو عارفين انو فرح قوية ، عيطت شوي بس بنفس الوقت حقدت ع هبة !

اجت ام هبه من السوق
ام هبة : وين فرح ؟! بتدرس؟!
هبة : لا بتدرس ولا اشي ، هلا كانت تحكي تلفون وتصور سنابشات 😈
ام هبة : طب بما انها ما بتدرس ليش ما اجت تساعدك؟! تعي وله ساعدي اختك واتركي هالموبايل !
فرح سمعت واختصرت وحقدت اكتر واكتر 😈

الساعه ٧ المسا ، اجت ام عصام وعصام واخت عصام عبير!
طبعا عبير عبارة عن ٦ زي فرح مع بعض بالقوية ، ٤ حيايا عاملين تجمع بمخها ، ٥١ حرباية ، مع ٦ عقارب ، بطلة المملكة بـ طولة اللسان والنميمة ونقل الحكي ، برونزية افتعال مشاكل ، فضية تهواي وطقع اسافين ، والمركز الاول مرتين بمسابقة الكرنبة الدولية!

الكل قاعدين الامور تمام ،، في حذر بالقعده ،
عصام قاعد ، وامو ع يمينو ، واختو عبير ماخده زاوية المدرب ، بتسمع و بتلسع حكي !!
ام هبة قاعده بتتبادل اطراف الحديث مع ام عصام ، عن الدوالي وموسم الدوالي و اذا فرّزت دوالي ومن هالحكي الفاضي ،، عصام قاعد وبستنى هبة لانها راحت تجيب بوشار هي عامليتو ،
اجت هبة ماسكة صحنين بوشار ، حطتهم قدامهم ،
عبير مدت ايدها اخدت حبتين بوشار واكلتهم وقالت :
بقول في ريحة اشي محروق! شكلهم انحرقو معك؟!
هبة اتطلعت ب عصام!
عصام اكل وقال : بس زاكيين والله ، وتطلع بأختو عبير يعني اختصري!
بعد مرور نص ساعة تقريبًا ،،
عبير : هبة عند اي دكتور عامله سنانك شكلو شاطر 😈
ام هبة : لا اسنان هبة من هي صغيرة زي اللولو!
هبة خف عقلها !

طلعت فرح بسرعة ، وقالت : هبة عملت سنانها عند دكتور عم صاحبتي بجبل عمان كتير شاطر واسعارو تمام!
هبة : اه اللي حشالي طحونتي؟!
فرح : لا ولك اللي لبسلك سنانك مالك؟!
ام هبة : فرح روحي شوفي وين حمزة ( بتحاول تقولها روحي )
فرح : وين بدو يكون حمزة يعني ، هيو جوى!

عبير عجبتها فرح ، نادتها تقعد جنبها!
وقعدو جنب بعض 😈

هبة بسرعة دخلت عالمطبخ ونادت امها : يما تعالي شوي!
اجت امها توشوش : ولك مالك عيب نترك الناس!
هبة : يما اذا ما بتنادي فرح هلأ بموّت حالي !
ام هبة : اتركيها تتسلى مع البنت خلص!
هبة : يما عليها دراسة !
ام هبة : لا ما عليكي درست حرام خليها ترتاح!
راحت ام هبة ،، هبة ضلت بالمطبخ تدعي ، تدعي انو ربنا يبعت بركان او زلزال او اي اعصار يوخد فرح او عبير مش مشكله! المهم وحدة تروح!

رجعت هبة تقعد ، شافت عبير وفرح امورهم تمام وحبو بعض ، هبة قعدت جنب عصام !
عبير : هبة ما عندك صور وانتي صغيرة؟!
هبة : عندي كتير بس ابصر ماما وين ضابيتهم !
ام هبة : ضايعين ، نسيت وين حطيتهم ، بس الاقيهم المرة الجاي بتشوفيهم!

- طبعا اذا عصام و امو واختو شافو صور هبة وهي صغيره ، رح ينحرق كرت هبة طول العمر!
انتو عارفين كل حدا وهو صغير كان عندو مشاكل بالصور واللبس والشعر والمكان ، والصورة اللي عالمرجيحة والصورة اللي بدون اواعي والصورة اللي ماسك فيها سماعة تلفون ارضي !
وهبة عندها ارشيف كامل من هالقصص!

بعد مرور ساعة ، هبة كانت رايحه تولع فحم الارجيله لحماتها ، رجعت هبه معها الفحم مولع ، شافت المشهد التالي :
عبير ماسكة صورة وواقعه عالارض من الضحك وبتتفرج عهبة وعالصوره!
عصام ماسك صورتين وبضحك وبتفرج ع هبة !
ام هبة بتحاول تلم الصور من ايديهم ،
حماتها ل هبة حاطة النظاره الطبيه وصافنه بصوره وبتبعد فيها وبتقرب وبتستغفر ربنا !

وفرح ماسكة شنتة الصور وبتطول وبتفرجيهم ، وبتغني : مخادع وبايع وقلبك حجر 😂 وبتتفرج ع هبه وبتقول :
ييي لسا ما فرجيتكم صورتها برحلة المدرسة وهي راكبة عالحصان!
طبعا هاي الصورة ، هبة من ٢٠ سنه بتدور عليها مشان تحرقها ، وطلعت مخبية عند فرح!

عبير تشردقت من الضحك ، ودموعها نزلو ، وماسكة موبايلها وبتصور الصور !
هبة واقفه ومعها الفحم ،

المهم في شهود عيان من الجيران قالو ، انو بعد مالضيوف طلعو من بيت ام هبة ، شايفين هبه بتركض بالشارع ورى اختها فرح ، بس قالو انو هبة وهو بتركض كاينه تشد شعرها وتزغرت بنفس الوقت !!

ومسعفين فرح وجايبينها عالبيت ، ومسكرين عليها الغرفه ، وحاجزين هبة بغرفة الضيوف ، وهي قاعدة هبه فاتحه موبايلها عالسناب ، فاتحه عالستوري تبع عبير ، ملاقيه عبير منزلة صورة هبه عالحصان وكاتبه عليها :
هاي خطيبة اخوي ، صح بتشبه البوكيمون 😂

حلفت جارتهم انو هبة خالعة الباب ع فرح بسنانها ،
وهيها فرح لهسا بترجف وبتغني نعناعه الجنينه ، والدكتور قال انو بدها اسبوعين رايحه وما توكل الا شوربة! لانو الارتجاج كاين قوي ع الجمجمة عندها ، ورضوض بالاقدام و توسع بحدقة عينها اليسار!

الله يهديها فرح 😔

#ولكو_انتو_بس_اتركوني_اشرب_من_دمها
#عمر_زوربا