من جُمل الأم المشهورة بمواضيع الرحلات :
الكل يوم الجمعة بطلعو رحلة ، الا انا بس بضل بهالبيت للخدمة والطبيخ ، قاعدة بهالبيت ، ليش هو انا عمري طلعت رحلة ، هيهم الكل بعبو بسياراتهم وبطلعو رحل!
والحزينة بس يوخدوها رحلة ، بتقضيها بالرحلة تفرم سلطة ، وتعمل تبولة ، وتدور ع كيس الملح الاسود اللي ربطتو ومتأكده انها جابتو!
وبيجي عليها ابنها الصغير الزنخ يقولها يما بدي اروح عالحمام ، وبقعد يفرك حالو قدامها وينط ويسكر رجليه ع بعض وبحملها مسؤولية حصر البول اللي بدو يصير معو!
وبنتها اللي حاطه سماعات بذنيها وبتسمع اغاني ومش سامعة حدا!
وجوزها بنكد عليها لأنها وهي قاعده بالرحلة الحزينة بتتذكر زمان انو مرة بس اجو سلافها وسلفاتها من السفر ، ابوكو اخدهم رحلة وتركوني بالبيت لحالي ، ورجعو مبسوطين ويضحكو ، وسلفتها القوية حكتلها ييي كان اجيتي معنا والله انبسطنا ، ولا يلا منيح انك درتي بالك عالبيت 
😏
😏
وبتصير الرحلة عبارة عن رحلة نكد و زت حكي ، و بختموها الشباب اللي بكل رحلة بكون معهم سيارة كيا سيفها ، بصفوها بعيد ، وبشغلو اغاني ، وبفتحو البواب ، وبكون واحد فيهم لابس شباح كحلي ، بصير يرقص ، وواحد قاعد ع بوز السيارة بزقفلو ، وواحد قاعد يتحكم بالاغاني من السيارة ( هاد اللي دافع بنزين اكثر ) ، وفي واحد فيهم ببعد شوي بضل يحكي مكالمة مع حبيبتو ، وهو راجع قبل ميسكر الخط : يلا باي هسا خلص بدي ارجع عند الشباب ، وهو جاي بسكر الخط وبحط الموبايل بجيبتو وبصير يزقف ويقول يلا رووووح ، والشب اللي جوى بعلي صوت الاغاني ، ما بلحق يهز هزه ، برن موبايلو ، بمسكو و برجع يحكي مكالمة ، وبنط واحد يقول يا زلمة اترك هالتلفون شوي جايين ننبسط ، !!
وفي العيلة اللي بكون فيها الاب ومعو بناتو كمان ، بقولهم هسا بدي اشتكي عليهم الشباب هدول واخلي الشرطة يجو يشحطوهم زي الكلاب ، وبضل ماسك موبايلو بحاول يرن ع صاحبو اللي بالأمانه اللي اخوه شرطي ، ومرتو تقولو شو بدك فيهم يا ابو محمد ، وابو محمد يقولها هسا شوفي كيف رح اربيهم!
طبعا بخلص النهار وبعدهم برقصو وماحد برد عليه لابو محمد ، وبضل يقول طلع مجاز مجاز ، لو مداوم كان اجو يشحطوهم !
بنتو بتقولو : يابا هاد صاحبك بطلع رخصة سواقة بالواسطة؟
يابا انتي بس تخلصي تدريبك احكيلي وما عليكي!
اختها بتقولها : ترديش تدربت وبس رحت افحص طفى موبايلو صاحبو وحلقلي !
ابو محمد : شو قلتي!؟
لا يابا بحكيلها المهم تتدربي عالصفة!
ام محمد : اسكتو ليسمعكو !
وبآخر الرحلة الام اللي كان نفسها تطلع رحلة ، الحزينة بتلم وراهم الكياس وماسكة قنينة مي بتخلصها وبتطفي النار فيها!
بنط جوزها هاتي اشرب! هي بنفس الوقت بتكون خلصتها عالنار ،
جوزها : خلصتيها!!!! قلتلك خليلي اشرب!
وبقضيها منكد بالرجعة ، وعامل انو ريقو ناشف!
والام قاعدة بهالسيارة وبتقول : هو انا بلبقلي اطلع رحلة انا !!
جوزها : هينا اخدناكي رحلة برضو مش عاجبك!
هاي رحلة هاي؟ اه ولا مهو انا مش خواتك اللي مره اخدتهم ع جرش وجبتو اكل جاهز!
جوزها بعلي المسجل وبكمل سواقة!
ومن يومها حلفت يمين ما تطلع رحلة !
#يا_حبيبتي_يما
#عمر_زوربا
تعليقات
إرسال تعليق