مسكينه البنت ، بتقعد ٦ ساعات تلف بالمول ، ومن طابق لطابق ، ومن محل لمحل ، ومن قسم ل قسم ، وبتنقي بلوزه من محل ماركا ، وبتقيسها ١٣ مره ، وبتصفن بالمراي ساعه وربع ، وبتتصور فيها ، وبتبعتها لصاحبيتها الثقه ، تسألها عن رأيها :
عبير بسرعة رديلي خبر حلوة البلوزه؟!
اه بتجنن وحلوه عليكي!
بتشتريلها بسعر غالي ، وبتحس حالها ضحكت عليهم واخدتها ب ٤٥ ،وبتعجق الدنيا ، وكيس كرتون ، ووسعولي ، وابعدولي ، وعالدرج الكهربائي ، وجاعصة بالكيس ، وانا اواعيي كلهم ماركات !
وبس توصل البيت ، امها بتكون بالمطبخ ، في طنجرتين عالغاز ، وفي عالرخامه تبعت المطبخ ، المفرمة تبعت السلطة ، كل شوي بتروح بتكمل فرم!
ماما لو تشوفي شو اشتريت!
بدل متساعدي امك ، صارلك من الصبح بالمول ، شو اشتريتي؟!
شفتي البلوزه اللي لبستها نسرين طافش بمسلسل صبايا الجزء الاول بالمشهد اللي كانت تستنى تكسي؟!
لا ما شفتها مالها؟
شوووفي اشتريت زيها ، وبتشيل البلوزه من الكيس ، وبترمي الكيس عالارض ، وبتحط البلوزه عحالها تفرجي امها !
امها : وهاي بكم اشترتيها؟
احزري ماما ، جد احزززري!
امها : بليرتين؟!
( هاي اول تنكيسة )
هيه : لا ماما شو بلرتين!
امها : مهي شريطه ، اصلا اواعي المولات تبعتكو هاي كلهم شرايط بضحكو عليكي
( هاي تاني تنكيسة )
هيه : لا ماما هاي الاصليه عاملين عليها سيل! اشتريتها ب ٤٥ دينار 
😍
😍
امها : إن شاء الله بتصيري ٤٥٥ شقفه يالبعيده ، ضحكو عليكي ببلوزه بتخزي ، تعالي اجيبلك زيها بليرتين من البلد!
( هاي التنكيسة الثالثة )
هيه بتعصب ، وبترمي البلوزه ، اصلا بديش البسها ، اصلا انتو بتكرهوني ، وبتدعس عالكيس ، والله منا لابسيتها ، وبتدخل عالغرفه ، وبتسكر الباب ، وبكرهكم بكرهكم ، وبترمي حالها ( طب ) عالتخت ، وبتبكي شوي !
وبتسمع امها بتقول عالتلفون ، لو تشوف اختك ضاحكين عليها ببلوزه ب ٤٥ ليرة ، تعال خدها رجعها
😂
😂
تعالي قومي هي اخوكي جاي بدلو البلوزه !
طبعا هي بتصير تتخيل انها داخله مع اخوها عالمحل ، وتشوف البياع اللي شافت حالها عليه ، وساقت عليه الهاي كلاس ، وبتتخيل اخوها بحكيلو : رجعلنا البلوزه هاي اختي سارقة مصاري من البيت وصرفتهم هون ، وقاعدين بنرجع كل اشي جابتو 😂
😂
بتقوم بسرعه ، بتوخد البلوزه ، وبتحطها بالكيس ، وبترجع عالغرفه وبتقول لا خلص انا انا برجعها ، خلص ببيعها لصاحبيتي بدها زيها!
بتجرب تبعت لصاحبيتها الثقه ، اللي قالتلها عنها حلوه ، بترجع بتصورلها اياها ، اسمعي طلعت صغيره علي تشتريها؟!
بتبعتلها بعد ساعة ، مع انها مش حلوه الا عاللبس ، بس ماشي بشتريها ، بكم؟!
قال هي هون بدها تتشاطر ع صاحبيتها ، وتثبت لإمها انها رح تربح بالبلوزه : بتقولها : اشتريتها ب ٦٠ ، بس ببيعك اياها ب ٥٠ ، بدك؟!
صاحبيتها بترد عليها : شووو ٥٠ ، ولك مهي حقها ليرتين 😂
😂
يلا باي
ملاحظه : البنت معها ضيق تنفس ورجفه ب ايدها اليمين من يومها !
#مهي_بليرتين
#عمر_زوربا
تعليقات
إرسال تعليق