كلنا مساكين

كلنا مساكين ، و حزينين ، وسارحين ، وكل واحد فينا في براسو مليون قصة يفكر فيها !!
قال ليش مش مبتسم ولا بتضحك !!

هداك الزلمه اللي بالسيارة ، ليش فتحت الاشاره وبعدو واقف ، لا مش ملتهي بموبايلو ، ولكو هاد سارح بأقساط السيارة ، والمدارس الخاصة ، والاساتذه الخصوصي ، وايجار البيت ، والدنيا شتوية ، وكاز ، وغاز ، ومليون قصة!!

هاد الشب مالو؟ ليش قاعد لحالو ، لا مش مجنون ، هاد صارلو سنتين خاطب ، وحماتو اكلت راسو لازم يتجوز ، وهو مش ملحق ، بشتغل شغلتين ، ولسا ما جمّع اشي ، وخطيبتو بتحكي ، واخوان خطيبتو بحكو ، وبرضو عندو عيله ، و اخ توجيهي ، ومليون قصة!!

هاي البنت اتركوها بحالها ، هاي الكبيره بخواتها ، هاي اللي تركت الحياة والدراسه مشان خواتها واخوانها الصغار ، ضيعت مستقبلها ، و امها تعبانه ، ورفضت كل اشي مشانها ، جيزة وتعليم وحياة ، وراح العمر ، وبعدها زي مهي ، ومليون قصة!!

هاي المرَة اللي بالتكسي رايحة تستلم حوالة من ابنها المغترب ، هو الكبير والمتعلم ، سافر و تهجر مشان هون راتبو ما كان مكفي لإشي ، اشترى فيزا وراح عالسعودية صارلو ٣ شهور ، ومن شهر توظف ، وهيو باعت كل راتبو ، رايح منو بس حق اكل ، وقاعده بتفكر وين رح يروحو المصاري، لأنها تداينت اكثر منهم ، ومليون قصة!!

شايف كل هدول اللي بالباص ، ليش كل واحد راكي راسو ع الشباك و سارح ، كل واحد عندو قصة ، واحد رايح يدور ع شغل ، واحد متمشكل مع ابوه ورايح مش عارف وين ، هداك رايح عالجامعه ومتأخر ، هديك اللي حاطة سماعات بدنيها رايحه تقابل لوظيفه ، لا بتحكيش مع حالها ، بتحاول تحفظ شو بدها تجاوب اذا سألوها اشي بالانجليزي ، هداك الشب مش جاي ينام بالباص ، هداك بداوم بفندق بالليل ، وبالنهار بشتغل ع تكسي ، فش مجال ينام غير هون ، ومليون قصة!!

اللي جوزها طلع كذاب ، واللي بنت حماها معذبيتها ، واللي تاركة ولادها بالحضانه ، واللي ضاع منو ٥٠ ليره ، واللي صاحب البيت بدو يطلعو ويجوز ابنو ، واللي امو مريضه ، واللي ابوه تعبان!

بس برضو عادي بنضحك ، و بايعينها ، ومش سائلين ، شو بدو يصير يعني ، اكتر من هيك اشي عاطل مافي!!

سكّر عداد المشاكل !!
‫#‏مليون_قصة‬
‫#‏عمر_زوربا‬