يا حرام طلاب التوجيهي بهالبرد ،،
بكون قاعد لحالو زي ابو بريص ،، و سامع صوت العيله ملتمين و بضحكو عند هالتلفزيون ،، و على حظو بصير دمهم خفيف و شغل نُكت و نهفات ، مع انو بس يكون قاعد معهم بقلبو نفسيات و نكدين وشغل ديون وقروض و مشاكل و كل واحد عابط موبايلو ، بستنوه يفوت يدرس بقلبو سيرك مع عروض ستاند اب كوميدي!!
وحظو المايل برضو ، بس يكون قاعد بكونو فاتحين التلفزيون ع برنامج ملوش دخل بالحياه ، مثلا بكونو فاتحين ع طريقة تفقيس بيض السمكة الحمراء المتواجده بالنهر الاسود بكولومبيا !! بس يقوم يدرس ، بقلب التلفزيون عبارة عن ترفيه و سينما منزليه وما يطلبه المشاهدون وبصير عبارة عن المارد تبع الفانوس!!
بعدين ترى كل العيله عارفين اساليبك يا طالب التوجيهي ، الحِجة تبعت انك رايح عالحمام كل ست دقايق بعرفوها ، وقصة انك رايح تشرب مي برضو هاي انحرقت قبلك ب ٦٠٠ دورة شتوية وصيفيه ، مشان هيك بحطولك مي بالغرفه ، وقصة الحمام سيبك منها ، ول هو انتا مُنخُل ، بلاها قصة تفوت عالحمام تصفن بالمراي و ترجع!!
وقصة انك تعمل حالك غفيت وانتا بتدرس والكتاب بحضنك هاي قديمه و فش فيها عاطفه ، يعني امك فاهمه عليك ، مش رح تقول يا حرام نام وهو بدرس وتجيب العيله يتفرجو عليك ، انتا مش حصان قاعد بولد ، ولا ذبانة فوق ذبانه ، لا صديقي ، امك بتصحيك تقولك صارلك ساعه نايم قوم ، هون خطتك بتبين ، وبتعترفلها انك صارلك ٥٠ ثانيه غافي ، خلص العب غيرها يا حصتي!!
الحليب ما بنجّح ، الفواكة ما بتنجح ، الاكل الكثير ما بنجح ، الموسيقى الهاديه ما بتنجح ، تدرس انتا وصاحبك انساها ، صاحبك عندو اسئلة مقترحه انساها ، الجوجل ما بنجح!!
ادرس بتنجح يا غالي يا ابن الغوالي ،،
اعبط هالصوبه و ادرس ،،
اعبط هالصوبه و ادرس ،،
تعليقات
إرسال تعليق