معلش سامحونا

في مشكلة غريبة بمدارس الحكومة مش فاهم شو الفكرة منها!!
لما ( المعلمة ) تطلب دفاتر من الطلاب ، و طالبة تجيب دفتر مكتوب على صفحتين فيه ، وطاويتهم ، او مازعيتهم ، لانو باقي الدفتر فاضي ،، المعلمة بترفض وبتقولها ارميه و جيبي غيرو!!

اتوقع ورقتين او ثلاث او حتى عشر صفحات ما رح تفرق بالدفتر يا معلمة ، يعني عادي راعو شعور الناس ، و يمكن في كثير ناس بأثر عليهم يشترو دفاتر جديده مهما كان حقو رخيص!!

وحتى لو انا وضعي تمام و معي مصاري ، ليش اشتري دفتر جديد و انا عندي دفتر اغلبو فاضي !!

انا بتذكر واحنا صغار كنا نستعمل دفاتر قديمة مكتوب عكم صفحه فيها ، كنا نطويهم او نمزعهم و الموضوع طبيعي!!

ولما المعلمة مربية الاجيال تقول لطالبة بصف ثاني ارمي الدفتر وجيبي واحد جديد ، نفسيًا هاد الحكي بأثر عالطالبه ،،

معلش يا معلمة تحملينا هالمرة ، و مشيلنا اياها ، واحنا اسفين لأنو اهل الطالبة تاركين المدارس الخاصة وجايين عندك ، بس بتعرفي الوضع ما بتحمّل !!

اسمعي مني القصة مش مستاهله ، مهي حارتنا ديقه وبنعرف بعض ، يعني اذا انتي ترعرعتي بمدارس اوروبا ، ولازم يكون الدفتر جديد ع ايامك ، احنا ملناش عهالقصص!!

اتوقع كلنا كنا نجلد الكتب بجرايد ، وكلنا كنا ندهن ورقة الدفتر زيت مشان تصير شفّافه لدفتر الطبيعة ، وكلنا قسمنا دفتر ال ٦٤ ورقة ل مادتين 👍🏻

طبعا انا ما بحكي عن الكل ، بحكي عن بعض المعلمات ، اللي وصلني اكثر من مسج بخصوص هالقصه!!

‫#‏معلش_سامحونا_لأنو_طفرانين‬
‫#‏عمر_زوربا‬