كل ولاد الحاره زمان كانو يرنو جرس جارنا اللي جاي من السعودية ،، يرنو الجرس و يهربو ،، الااااا انا ،، مااا الحق احط السطل واطلع عليه وامد ايدي عالجرس ،، الا هو شاددني من بلوزتي زي رامي الصياد الصغير!!
يا اما ( يزحط ) السطل تحتي و اوقع !!
المشكله كانت بالتخطيط ،، القانون زمان كان ما بزبط ترن الجرس اكتر من تلت مرات و تهرب ،، لانو المره الاولى بطلع صاحب البيت وبفكر في ضيف ، وبلاقي انو فش حدا ، المره الثانيه بطلع برضو وبشوف طرف ولد وهو هارب ، بشك بالموضوع ، المره الثالثه بتأكد انهم ولاد الحاره برنو وبهربو ، انا من كتر منا غبي و تيس مزرعة ، كنت اروح المره الرابعه ارن !!
احمل علبة السمنة زي الاطرم و اروح ، والزلمه يكون متربص ورى الباب زي مصيدة الفيران ،، احط العلبة ، واثبتها بالارض زي اللي بدو يشوت ضربة جزاء ، ازيحها يمين وشمال مشان التوازن ،، واشلح بابوجي البلاستيك وامسكو مشان اركض اسرع وانا حافي ،، واطلع عالعلبة واحس بالبرودة ،، واكبس الجرس بقوة ،، ويطلع جارنا ، على دوري يصير ابو الحروف ، مع انو دايما مشاكل هو ومرتو لانو تعبان وعالفاضي ، بس لاااااا ، عندي انا بصير دينامو ، بصير ( سوبر ايرون مان اندرتيكر بروسلي ستالوني ) ،، بصير صياد الطيور المهاجرة المستفزة ، بقلب ع حظي بمكتب المكافحة ، بصير الحدق الخفيف السريع الماكر اللمّاح اليقظ الماهر ، بسحبني عن علبة السمنة زي الشعرة من العجين ، بحملني زي الذبانه اللي فالت جناحها ،، وبصير اخابط برجليي زي سمكة السردين اللي بتنازع ، والجمله المعروفه ، طب واللللله مهو انا ،، والللله مهو انا ،،
قال وولاد الحاره من بعيد بصيرو يرمو حجار وهو ماسكني ، همه مش عارفين انو كل حجر برموه ، بتزيد نسبة الكفوف ع رقبتي ، العلاقة طردية ، انا بعقلي بقول لااااا بعرض خواتكو ترموووش ،، وهمه برمو ، ويا حبيبي لما واحد منهم يصير يسب عليه ، ويقولو سيبووو يا اخووو التوووت ، هووون خلللللص ، انا انتهيت ، والله انتهيت ، وش صار فيّاااا ،، بس احلى اشي في جارنا انو ما كان يقرص ، بس كان ماهر جدا بالشلاليط تبعت التصميد ، يعني ماسك بلوزتي ، بضربني الشلوت ، وبرجع برتد عليه ، مشان الشلوت اللي بعدو ، يا عمي انا من يومي مطيع وبحب اساعد ،، وما كنت اقدر افلت منو الا لما اهديه بلوزتي ، يعني اشلح البلوزه اللي اصلا صارت كثير واسعه من الشد ، صارت عباره عن منطاد مجعلك ، اسحب حالي من البلوزه زي لما نحط سيخ المشاوي جوى رغيف الخبز ونسحب السيخ يطلع فاضي ، و اهرب واسب عليه واقلو والله لاخلي ابوي يجي ويضربك ويوخد البلوزه يا ابن التوت ، هو عالسريع يرمي عليي علبة السمنه و يقرقع الحاره ، وتيجي بدها تخبط برجليي ، انا انط لفوق وتمشي من تحتي ، زي القفز عن الحواجز ،، واركض هارب وانا بعرج و بقمز قمز زي اللي اجرها مكسورة ومضطرة ترقص مجاملة بخطبة اختها الكبيرة ،،
واستناه شوي ليرمي البلوزة ويدخل عبيتو ، اروح ركاض وقال اقرب عند البلوزه ، وامد ايدي عالبلوزه شوي شوي ، قال يعني لو قربت خطوه رح اموت ، احاول امسك البلوزه زي اللي وقع منو موبايلو بالمغسلة ، اخدها عالسريع واهرب !!
واحمل علبة السمنه ، واصير اطبل عليها واغني كلام ملخبط وانا بعرج ، قال مشان افرجي ولاد الحاره اني عادي ، مع انو في خط احمر ع رقبتي من قبة البلوزة ، وبعرج ، ودموعي نازلة ، وبغني ، اه لا هو لا يا لا اه عو عااا ،،
وبفوت عالبيت اتوجع ، وارفع بنطلوني من تحت اشوف اذا في جرح ع ركبتي ، واغسل وجهي ، واحاول امثل انو فش اشي قدام العيلة ، بس العرجه هي اللي كانت تكشفني :(
وبنفس اليوم بالليل وانا نايم بصير احكي وانا نايم واتلمس ، لانو اخوي حكالي شفتك بالليل رافع ايدك وبترن جرس بالهوى :(
اصلاتن باي يا حوانين بكرهكم :(
#ترررن #طاق_طااق_طاقيه
#عمر_زوربا
تعليقات
إرسال تعليق