حصان لونو زهري

بنت الشيخ منصور بن زايد آل نهيان ، البنوتة طالبة من ابوها حصان لونو ( زهري ) ، صبغولها ولونولها حصان وجابولها اياه!!

انا عمر ابن الشيخ محمود زوربا ، وانا صغير قعدت اعيط ٩ ايام بدي ( صوص ) لونو اصفر أبو الشلن !! ما حدا عبرني ،،
استنيت لما اجى الزلمة اللي ببدل بابوج ( حفاية ) البلاستيك بصوص ، ركضت ورى ٦ كيلو جري حر ، ونسيت انو كانو يقولو عنو بخطف ولاد ، و اعطيتو حفايتي البلاستيك اللي لابسها ، واعطاني الصوص!
ابوي شافني من بعيد جاي حافي ، وبحاول امشي عالارض اللي فش فيها چزاز وحجار ، وحامل صوص بنازع ، شفق عليي الشيخ ابوي ، واعطاني شلن قلي روح رجّع البابوج واعطيه شلن وخود الصوص ، اخدت الشلن ورجعت ركاض وانا حافي ، ايد فيها الصوص مصفرن ، والايد الثانيه عرقانه وفيها الشلن ، وشادد عليه ليضيع ،، تبع الصيصان كان ماشي ، وحاطت شب ورى عند الصيصان والحفايات ، وانا بنادي عليه من بعيد ، شافني و هدى السرعة شوي ، وانا اركض لوصلتو ، هو بمشي وانا بركض زي اللي بسلمو الراية بالسباق ، قلتلو اعطيني حفايتي اللي اعطيتك اياها قبل شوي ، وخود هي شلن بدالها ، وبدللي الصوص بواحد لونو احمر ، انا مش فارق معي اللون ، بس الصوص اللي بإيدي كان بدو يموت ، بدي ابدلو بالعقل ،،
المهم الشب اللي ورى ، اخد الشلن ، و اخد الصوص ، ولا اعطاني حفاية ، ولا اعطاني صوص ، ولما البكم بعّد عني ، رمالي فردة حفاية زنوبه مش بلاستيك مضحوك عليه فيها ،،

رجعت ع ابوي ، لا معي شلن ، ولا معي صوص ، ولا معي حفايه ، ورجلي الشمال دخل فيها حجر زفتة مبّوز صغير ، وصرت وانا امشي ارسم نقطة دم عشكل الحجر عالارض ،،

المهم عسيرة بنت الأمير ،
من يومها ( بابا ) وعدني بس يشوف الزلمة تبع البكم تبع الصيصان ، يضربو ، ويوخدلي الشلن ، ويوخدلي حفاية جديده ، ويجيبلي صوص من اللي بكبر و بطّول وبصير نسر 😍

وعسيرة الحصان الزهري ، لهسا ( زهري ) ورجليي بوجعوني من كتر مركضت يومها !!

وعسيرة المعايرة ، كمان اسبوع بصير عمري ٣١ سنة ، ولهسا اخواني بعايروني بقصة الصوص والحفاي البلاستيك !

في مثل بيقول :
لو تجري جري الوحوش ، غير رزقك ما تحوش

#يابا_بدي_اتصور_جنب_الجمل_البلاستيك
#عالعيد_يابا
#اجا_العيد_وراح_العييد #ومتصورناش
#عمر_زوربا