لازم بحياة كل بنت بالدنيا ، يكون في عندها صاحبة الها ( تبصملها ) على اي اشي بتحكيلها اياه !!
صح انا ضعفانه؟! اه صح
صح صورتي هاي بتجنن؟! اه طبعا بتجنن
صح هاي اللبسه عليي زابطة؟! اه كتير زابطه
صح لون شعري حلو؟! اه احلى لون
هي بتعتبرها ايدها اليمين و سندها والشاهده معها عكل اشي ، حتى بالحروب اللي بتصير ع چروب ( بنات وبس ) عالواتس اب ، هي اللي بتدافع عنها بكل اشي ، زي اللاعب القادم من الخلف ، بتدعمها بأي اشي ، وبالعاده بكون اسمها سوسو ، يعني عندها اسم دلع ،، و معظم الشات بكون مكتوب فيه ( حتى اسألو سوسو ) ، بتيجي سوسو زي حرباية المزرعة القديمة ، بتطلع لفوق بالشات ، بتفهم الموضوع ، بتقيّم المشكله ، بتحلف يمين ، وبتستغفر ربها بعقلها مشان الكذب ، وبتقول بعقلها يارب سامحني عالكذب والشهادة الزور اللي بدي اكتبها ، وبتبلش قصف مع صاحبتها ضد الاعداء ،،
مثلا هبه بتنزل صورة فستان عالجروب ، الفستان من شكلو حقو ٧ ليرات مع مكواي هدية ،،
بتنط امل بتقول : هبه فستانك بجنن بكم اشتريتيه؟!
هبه : اخدتو ب ١٥٠ بعد ميت ترجاي ، حتى اسألو سوسو
اسلام : ووووول ب ١٥٠ ، والله لو انو فستان مرت الملك فاروق!
هبه : والله ب ١٥٠ ، حتى اسألو سوسو
امل : ولك هبه ليكون ب ١٥ بس انتي زايدة صفر من عندك ؟!
عبير : هههههههههههههه
( هاي عبير خبيثه بتراقب من بعيد و هوايتها التهواي والضحك والتدخل السريع )
اسلام : ولك ليكون قصدك ١٥٠ ليرة لبناني؟!
عبير : هههههههههههه
هبه : عفكره كنت انا وسوسو واشتريناه 😡 هلا بس تيجي اسألوها
هبه بترن ع سوسو ٥٠٠ رنه ، بترد سوسو
هبه : ولك وينك وينك وينك وينك؟؟؟
سوسو : كنت اجلي جليات الغدا كانو عنا دار خالي
هبه : بتتذكري الفستان اللي اشتريتو انا وياكي الاسبوع الماضي؟
سوسو : اه اللي ب ٩ ليرات مع وجه مخده؟
هبه : ولك اه اه بس انا قلت لبنات الچروب انو ب ١٥٠ دينار ، وفوتي وقولي اه
سوسو : اوك حبيبتي
بتفوت سوسو عالجروب زي العقرب الماكر ، ام الحروف ، زي خنفساء الطربيزه ، ، وسعولها
سوسو : صبايا الفستان انا بإيدي دفعت حقو من هبه ١٥٠ دينار ، كان طالب فيه ٢٠٠ بس فاصلناه نشف دمنا الحقير!
هبه : 😇😇😇
عبير : اه والله شكلو بسوى اكتر
اسلام : ابصر يمكن
امل : مين بدو يشهد مع العروس؟
عبير : شو قصدك يعني سوسو كذابه؟
اسلام : سوسو بكرا فاضيه تروحي معي نشتري واحد؟!
سوسو : لا انا نازله عالعقبه مع دار خالو اسبوع
اسلام : خلص الاسبوع الجاي بنروح
هبه : اصلا ما ضل عندو زيو اخدنا اخر قطعه ، صح سوسو؟
سوسو : اه اه صح اخر قطعه
ايتها الفتاة ، ابحثي عن سوسو بحياتك ، انها مفيدة جدا ، وبلا خطبه بلا جيزة بلا بطيخ ، سوسو أهم !
#كائنات_مفيدة #سوسو_واقطع
#عمر_زوربا
تعليقات
إرسال تعليق