عزيزي الزوج ، عزيزي الخاطب :
لما مرتك او خطيبتك تقعد ٦ ساعات بالصالون ، وتيجي تسألك : حبيبي كيف شعري حلو؟ عجبك؟
بنصحك هون ما تسوق فيها الشخصية الصريحة ، و سيبك من مبدأ انك بتقول للعاطل عاطل بعينو !
هاي القصص سوق فيها بشغلك او بين صحابك !
يعني حتى لو شعرها مش حلو و لونو فاقع و معجبة عحالها وشعرها طالع زي طُبة الصوف ،
اكذب يا غالي ، اكذب و نافق ، هون مسموح الكذب ،
احكيلها حلو و حلو و حلو ، حاول تألفلها بيت شعر كمان ، قلها كان حلو وصار أحلى !
لأنك لو جاوبت بصراحه ، رح تخسرها ، وتخسر حالك ، وهالحزينه صاحبة الصالون رح تخسر مشروعها، و رح يعم النكد والمشاكل في كل مكان!
* هذا القانون ينطبق ايضا على :
صاحبتِك اذا سألتك عن لبستها اذا حلوه !
صاحبتِك اذا سألتك عن صورة تخريجها !
صاحبتك اذا عاملة nose job وسألتك اذا مبين انها عامله تجميل!
صاحبتك اذا سألتك صح انا ضعفانه! بعد ساعتين ريجيم!
.. الخ
هاد كلو للبنات ،
اما الشباب عادي ، اصلا بكون الاشي حلو بس بنحكيلو بخزي مجاكره 😂
#اسلوب_تجنب_الحروب #سياسه
#عمر_زوربا
تعليقات
إرسال تعليق