من المشاكل اللي كانت تواجهنا زمان !
١- لما يكون ( ابن صفّك ) ساكن معك بنفس الحاره !!
٢- ولما يكون شاطر وبطلعش عالحاره كثير وبقضيها دراسه!
٣- لما تكون امه و امك صحبة !
٤- لما تكون امه كثير بتمدح فيه قدام امك !
٥- ولما تكون انتا اصلا هامل ومش تبع دراسة !
سيئات القصة :
طول مهو بالبيت ومش طالع ، انتا لازم تضل بالبيت!
ما بتقدر تخبي اي موعد امتحان ،
لانه امو رح تنط عند امك وتقلها :
والله هيو مروان من لما روّح من المدرسة وهو يدرس ع الامتحان!
بتناديك امك قدام امو ، بصوت عالي غريب!
انتا بتوقف بالنص !
يما انتو عليكو امتحان بكرا؟!
طبعا انتا بتبلش مرحلة بلع الريق والتأتأه والعجقه والعرق والرجفه وعيونك بتحمّر !
لا يما ما عنا امتحان !
بتنط امو ، لا عندكو بكرا امتحان رياضيات ، واليوم وزعو ورق امتحان العلوم !
صحيح وقعتولو على الورقه؟؟! ابني جاب ١٠/١٠ ، انتا كم جبت؟!
هون انتا اقرأ عحالك آية الكرسي مبدئيا ،
لأنو الاسطوره تبعت انو انا ورقتي ضايعه ، انساها!
الاستاذ ما سلمني الورقه ، انساها !
جبتها بس ضاعت مني ، انساها!
اخدها ابن صفي يفرجي الاستاذ انو اجابتو صح ، انساها!
معاك ٣ حلول :
يا اما بتشلح بابوجك و بتهرب حافي عالحاره ركاض لتروق امك او ليجي ابوك وامك تلتهي فيه!
يا اما بتشلح بابوجك وبتناولو لأمك تكفكفك فيه جولة ع وجهك! وبتسلمها خدك للقرصة الاسطورية اللي بتعملك شلل نصفي!
يا اما بتروح ركاض عالمكان اللي دفنت فيه ورقة الامتحان بالتراب ، وتكويها من التطعيج ، وبتسلم امرك لواحد أحد ، وبتعطيها لأمك تشوفها!
ابن حارتك مع ابن صفك رح تخليك عايش برعب لمدة سنة كامله ، بزبطش تهرب عالحصة السادسة ، بزبطش تقول روحونا مشان الشتا ، بزبطش تقول في اجتماع اساتذه ، بزبطش تقول الاستاذ غايب ، بزبطش تلتم ع شلة اخر درج بالصف ، بزبطش تنام بالحصة ! بزبطش تدخن!
اما البنات خبيثات وعقارب ، بكونو الثنتين شاطرين ، وبقلبوها جو المنافسه وستار اكاديمي بالحاره ، وامياتهم بجاكرو بعض بورقة امتحاناتهم !
#مين_قعد_مكاني_بس_عطلت!؟
#عمر_زوربا
تعليقات
إرسال تعليق