حاطة صورة علبة نوتيلا ،
وكاتبة جنبها ( هاي النوتيلا تبعتكم )
ومنزله تحتها صورة خطيبها ،
وكاتبه جنبها ( هاي النوتيلا تبعتي )
وكاتبه اسمو فوق ، وكاتبيتلو ( بحبك يا نوتيلتي ❤️ )
طب سؤال : اهاليكم بعرفو بهالحكي؟! يعني خلينا نفرض انو ابو خطيبك اسمو ابو رمزي ، ومكتوب عباب بيتهم منزل السيد ابو رمزي المحترم ،
ابو رمزي بعرف انو ابنو صار اسمو ( نوتيلتي ) !!
طب سؤال ثاني : لما اجو جاهة عبيتكم مشان يخطبوكي ، الزلمة الكبير اللي حطو قدامو فنجان القهوه ، وقال لا والله ما بشربها الا لما تعطونا ابنتكم الكريمة الاديبه ! لإبنا الرجل الاديب الخلوق الزلمه رمزي ،
كان يعرف انو رمزي ملقب ب نوتيلتي؟!
طب افرضي عم خطيبك قاعد بقرا الابراج عالفيسبوك ، ضربت عينو ع بروفايلك ، وشاف صورة ابن اخوه وهو مرمي جنب علبة نوتيلا ومكتوب جنبو نوتيلتي !!
لا اذا هيك رجعولنا موضة ( الحياة احلى مع خطيبي )
و أول عاصفة رملية مع خطيبي !!
نوتيلتي؟! ولك نوتيلتي؟!
يعني لو حطيتي بدل النوتيلا صحن برازق ، صفط غريبة حرف إس ، وقيه بقلاوه ، كيس عوّامه ، كان اهون بلى!
طب انا متأكد انو رن عليكي بس شاف الصوره ، وحكالك اسمعي ، اشطبي الصورة ، بلاش خواتي يشوفوها والله بفضحوني 😂 ، وخلي القصص هاي بيناتنا 😍
وهي قالتلو : ديش ديش ديش حره انا ختيبي وحره فيك ، واللي غيرانه تروح تطق !
ولك مين بدها تطق يا هبله؟ يا هبله يا هبله؟
ولك مين بدها تغار من نوتيلتك ؟! ولك البنات هسا عندهم علبة النوتيلا بتسوى مليون زي خطيبك 😂
صبايا اذا بدكم تروحو تشترو نوتيلا ،
ديرو بالكم تلاقو ( خطيبها ) بعلبة ، انتبهو ع علب النوتيلا منيح ، انا مشانها والله ، بلاش وحدة توكل خطيبها ،
نوتيلتي؟؟؟! ولك بدك تجلطيني انتي؟! قال لا وحاطه سهم وموجهيتو باتجاه خطيبها !! ولك اطرق حالي سهم وترتاحي مني!!!
انا متأكد انها رح تعملي بلوك لانها صديقه عندي ،
طب مهو يعني عادي اشوف هيك صورة واسكت؟ ولك بقدرش بقدرش بقدرش بموت بفقع ، ولك استفزيتي اعصاب قلب اصابع كيبورد اهلي!
انا خلص تعبت خلص مش قادر ، خلص بدي اهاجر ع اقرب بلد افريقي ، بدي ارمي حالي بأي غابه استوائية اخلي النمور والاسود والذئاب المفترسة تنهش لحمي خلص !
الله يرحمك يا ستي ، لو انها عايشه هسا ، كان حطت صورة تنكة جبنه بدل النوتيلا ، وحطت صورة سيدي وكتبت ( جبنتي ) او ( جبونتي )
#نوتليتها
#عمر_زوربا
تعليقات
إرسال تعليق