في اشخاص القصة عندهم مش إنو بغار ع حدا وبعصب ع اتفه الاشياء!
القصة انو بدو يخلع من العلاقه وبمسك بأتفه مشكله مشان يعمل قصة ويخلع !!
يعني ، ابراهيم على علاقه مع نسرين ،
ابراهيم بدوش نسرين اصلا بس مش عارف يخلع ، لأنو بيوم من الايام وعدها انو يخطبها ، بس ندم عالقصة ، لانو نسرين حقنه ، هو بحبها ، وهي بتحبو ، بس يا عمي هو مش تبع خطبه وجيزه ، بس وعدها ببداية العلاقه من حلاوة الروح ومشان يزبطها ،
المهم في هاي الحالات ، ابراهيم بدو يخلع ، بس كيف!!
رح يبدا يدقق ع اتفه الشغلات ، بقصد الغيرة !!
مثلا :
رن ع نسرين الساعه ١٢ الظهر ، وهو عارف ومتأكد انها بتحكي مع اختها لانها ضايعه بدخلات دار عمتها اللي رحلت جديد ،
ابراهيم اصلا رن رنه صغيره وشافها مشغوله ،
هيه مسكينه طرقت الخط بوجه اختها ، ورنت ع ابراهيم!
نسرين : اه حبيبي سوري كنت مشغوله مع شيرين ضايعه اسكت!
ابراهيم : كذابه ، مع مين بتحكي؟! مع شب؟
نسرين : لا حبيبي شب مين ، والله اختي ، حتى هيها بترن !
ابراهيم : طب روحي كملي معو ، وبسكر الخط!
نسرين هون هبله ، بتقول بعقلها ، يقبرني شو بغار عليي ، لهالدرجه بحبني ،،
وبتضل نسرين تراضي ابراهيم ٣ ايام و ٤ ليالي !!
ابراهيم اصلا خلص بدور ع مشكله مشان يفرط العلاقه ، بس نسرين بتسكر كل المنافذ ، بتبعتلو سكرين شوت عن المكالمه ، وبتخلي اختها تحكي معو وتحلفلو انها هي اللي كانت تحكي ،
ابراهيم بصفن و خلص برضى ، وبصير يدور ع قصة ثانيه تافهه يخلع فيها !!
نسرين يا حصتي ، تعالي احكيلك كلمتين حلوين ،
نسرين يا نسرين ، مش هيك الغيرة يا نسرين ،
ابراهيم ( بتلكّك ) يا نسرين ، اخلعي يا نسرين ،
اذا قلك بغار من التخت اللي بتنامي عليه ، هاد مش حب ولا غيرة ، هاي فزلكة منسقة ، وخطط مشاكل مدروسة ، سيبك يا نسرين ، اخلعي بكرامتك يا نسرين ،
ابراهيم محتار كيف ينهي يا نسرين !!
ابراهيم لما يكون يحكي معك عالواتساب ، طبيعي تكوني اونلاين ، لانك بتحكي معو يا نسرين !!
مشان هيك لما يسألك انتي مع مين اونلاين!!
هاد سؤال غبي يا نسرين ، وجوابك اغبى ، لما تقوليلو والله ما بحكي مع حدا !!
يا نسرين منتي بتحكي مع ابراهيم !
احكيلو يا متخلف منا بحكي معك وانا اونلاين !
ترديش ع قلبك اللي بقولك يماااا شو بغار يؤبشني شو حمش !! اخلعي بكرامتك يا نسرين اخلعي!
هاد بتفزلك يا نيسوووو !!
قولولها لنسرين قولولها !
#اخلعي_يا_ام_النيييس
#عمر_زوربا
تعليقات
إرسال تعليق