طريقة نقل الخبر عنا جدًا غريبه و مش مفهومه وبتدخلك بمليون حيط وبتخليك تحس حالك عايش بالحرب العالمية التاسعة ،، مثلاً :
- الحقيقة : شب تمشكل مع شب على صفة سيارة على باب مول ، واجا الشب تبع الأمن و حل الموضوع !
- الخبر : مشاجرة عنيفة على باب مول في عمان و قوات الأمن تهرع للمكان !
المشكله الناس اللي بتفوت تعلق عالخبر :
١- اه والله مريت من هناك وشفت شب مطخوخ بعينو وبركض!
٢- كل القصة عشان بنت متأكد!
٣- هاد اكيد من اللاجئين ، مهو كثر التهلي بجيب الضيف الوسخ!
٤- يخوان مسيل الدموع وصل البيت عنا مش قادر اتنفس!
٥- وين الحكومه وين الدوله وين الأمن وين الملايين!
٦- مهو كلو من البطاله و سيارات الحكومه والفساد!
هيك بنكون احنا عملنا قصة طويله عريضه ونزاع شامل كامل وولعنا الدنيا مشان شبين تمشكلو وتصالحو وباسو على روس بعض ، واحنا ذبحنا بعض عالفيسبوك من ورى خبر كلو فتنه!
الاسباب ورى هاد الحكي :
١- الفضاوه !
٢- موبايل التتش سريع الكتابه!
٣- حزمة النت الرخيصة !
٤- زيادة نسبة المشاهدات واللايكات!
٥- الناقد السياسي اللي عايش داخل كل مواطن!
٦- المراسل الصحفي اللي عايش داخل كل مواطن!
٧- حب الاكشن والمغامره!
٨- الفتنة وحب خلق الشوشره!
#اتقوا_ربنا #الفتنه #التهويل
#عمر_زوربا
تعليقات
إرسال تعليق