رجاء خاص من اللي زعلان من حدا ، و اجا يصالحو !
رجاء خاص خليه يثقل شوي ويوخد وقتو 😔
خليه يعيش جو الزعل شوي !!
يعني تزعلش منو لأنو ثقل شوي ، وتزعل ويصير هو بدو يصالحك لأنك جيت تصالحو وزعلت لأنو ثقل!
اعطو الزعلان حقو 😂
مثلا :
رافعة مرتو ل خليل ، حلفت مليون يمين ل خليل انها ما تأرجل ، لانو خليل بخاف ع صحتها ل رافعه ،
المهم رافعه انعزمت عند صاحباتها عالفطور ، بعد الفطور ، ولعو هالاراجيل ، و رافعه قاعده ، وريحة المعسل بتهفهف بالمكان ، حاولت تلتهي بالفواكه ، اكلت جاط الفواكه كلو ، عالفاضي ، سلخت صحنين قطايف و عوامه ، برضو عالفاضي ، تناولت نص كيلو مخلوطه وبزر ، برضو ما قدرت تقاوم الارجيله ، قامت عملت تمرين معده ١٠ مرات ، برضو ريحة الارجيله مسيطره عليها ، قامت عالمغسلة غسلت وجهها و عيطت شوي عالمراي ، برضو عالفاضي !!
بالاخر خلص مش قادره يا عمي ، مسكت هالارجيله ، زبطت الفحمات ، وهي بتقول بعقلها هي مطوله معك يا خليل ، ومسكت هالارجيله وبلشت تأرجل ، خلص يا عمي عليي وعلى اعدائي مش قادره!!
خليل ماسك هالسنابشات وبراقب الصور ، لمح مرتو رافعه عامله غيمه فوق راسها من الارجيله ،
خف عقلو خليل ، تكهرب خليل ، رن ع رافعه ، رافعه مسكت الموبايل ( خلولي يتصل بك ) ، قالت بعقلها شكلو بدو يسألني عن بطاريات لريموت التلفزيون ، ردت رافعه ، خليل حكالها :
بتأرجلي يا رافعه؟! وين الوعود؟! وين الضحكه والورود؟!
رافعه : حبيبي مئدرتش مئدرتش ، وصاحباتي مصرين اني أأرجل!
سكّر الخط خليل بوجهها ل رافعه ، ورمى الموبايل عالكناباي اللي جنبو ، وولع سيجاره ، رن موبايلو ، فكرها رافعه ، طلع حارس العماره ، سكر بوجهو ورجع يدخن!! رجع مسك موبايلو وفتح السنابشات ، شاف صوره جديده لرافعه بتأرجل وكاتبة ( ارجيله تايم )
خف عقلو خليل وزعل ! وقام وقعد عالبرنده يعيش جو الزعل!!
اجت رافعه بعد ساعه ، وريحتها معسل عنب ونعنع ، خليل مولع السيجاره وصافن بجارهم اللي بنزل غرفة نوم !
رافعه : خليل 😔
خليل مطنش
رافعه : خلووولتي 😍
خليل فاصل
رافعه : يا بطة 😘 ( معروفه كلمة بطة بتسيطر ع خليل )
خليل ثقلان وما رد
رافعه : خلص زي مبدك انا رايحة انام 😏
زعلت رافعه لأنو خليل ساق فيها الثقلنه!!
بهاي الحاله خليل لازم يروح يصالح رافعه لانها زعلت لأنو ثقل !
مع انها بس حكتلو يا بطة ، قال بعقلو ( احكي كمان كلمة والله لأرضا ولك احكي 😍 )
بس رافعه ما حكت وراحت 😔
هيو خليل صارلو اسبوع بنام عالكنباي بالصالون ، وبتغطى بحرام الضيوف 😔
يا عمي اعطو الزعلان حقو 😡
مالنا يا رافعه؟؟!
#ارجولتي
#عمر_زوربا
تعليقات
إرسال تعليق