اللي برن عليك و بصحيك من النوم ، عادي فش فيها اشي يمكن ما بعرف انك نايم !
بس الـمش عادي لما يقولك خلص ارجع كمل نومتك و بس تصحى احكي معي!!
اي بالله عليك؟! يا زلمه شو هالحياة السهلة والمثالية اللي عايش فيها!! كيف يعني ارجع اكمل نومتي!!
ولك مهي راحت النومه ، راحت وشو بيضل غير الهم!؟
يا زلمه انا ضحيت بحالي مشان اصلا اقدر انام ، عملت يوچا مشان انام ، عديت لل ١٠٠ مليون مره ، وجربت كل طرق الاسترخاء مشان انام !!
مش بكفينا جبهة الذكريات والتخيلات والتحليلات والتوقعات والاستنتاجات والاكتشافات اللي ما بتخلينا ننام اصلاً !!
مش بكفي بنصير نتذكر ادق التفاصيل ل ٢٠ سنه مرو ، و تنبؤات بعد ١٠ سنين !!
ولك صار الحل اني انام ، اخلي اخوي يسلخني بعصاية البيسبول ع راسي ويغمى عليي مشان اعرف انام!!
و بتيجي انتا بالاخير و بكل برودة اعصاب بتصحيني وبتقولي ارجع نام ، هو انا مفكرني شغال عالچير ، احط عال R وارجع وعادي !!
منا عالكبسة منا ، يلا اكبس كبسة النوم يلا!
وبالاخر شو الموضوع المهم اللي صحيتني مشانو؟!
بكون بدو يسألني عن لون كڤر موبايل ابن خالتي اللي اجى من شهرين من السعودية!
او بسألني عن سعر مراية هونداي افانتي مستعمله ونظيفه!
او يمكن بسألني عن مثلا كم بكلف تكبير صورة مع برواز من النوعيه المنيحه!
او عن طريقة تحضير عجينة البلوط !
قال ارجع نام قال!
يا زلمه حل عنا ياااا
#ارجع_روح_طالعه
#عمر_زوربا
تعليقات
إرسال تعليق