الحكومة ترفع الرسوم الجمركية وضريبة المبيعات على حقائب اليد والحقائب المدرسية والألعاب!
انا بس بدي اعرف مين الشخص اللي بالحكومه ، اللي بكون قاعد وبقترح الشغلات اللي يرفعوها ، نفسي اقعد انا وياه بعد الفطور ، واولعلو سيجاره ، وكاسة قهوه حسب طلبو ، واصفن في شوي ، وافهم شو الجو تبعو ، شو ميولو ، شو اهدافو ، شوفي براسو ، شو بدو بالزبط !
بدي اقولو تعال يا عمي ،
وين الفكره من رفع حقائب ( اليد ) مثلا؟! بررلي الرفعه واقنعني ، والله لاقولك معك حق!
طب الحقائب المدرسية؟! طب ليش؟! طب مش بكفي الاهل الاقساط والرحلات واواعي التخرج ، وهدايا المعلمة بعيد ميلادها!
طب الالعاب؟! طب انتا عندك ولاد يا غالي؟! طب انتا لما تمسك ايد ابنك وتروح تشتريلو لعبة سبايدر مان ، وتلاقي حقها ارتفع ٣٠٪ ، شو موقفك؟!
طب هل رفع هاي الشغلات مرتبط ببرميل النفط؟!
طب معقول في شنته مصنوعه من البنزين؟!
طب في شنتة مدرسية فيها غاز؟!
طب هل في لعبة فرد المي ، بدل المي فيه ديزل؟!
طب هل رفع هاي الشغلات رح يسد اشي من المديونيه؟!
طب ليه كده تشغل قلبي وقلب العاب الاولاد؟!
من كثر م انتا مهتم بالتفاصيل ، يمكن بكرا ترفع ملاقط الحواجب مثلا ، او ترفع خواتم الفضه ، او بطارية ساعة اليد ، او ترفع القداحات ام كبسة!!
هو انا بالعاده بكتبش بالسياسة هاي ، بس صراحة انتا مستفز ، مستفز لدرجة اني صار نفسي اضل امشي لحالي لمدة ٦ ساعات بعرفش ليش!!
#ولك_ميله
#عمر_زوربا
تعليقات
إرسال تعليق