ذكريات حارتنا 1 | عمر زوربا | Omar Zorba

ما كان مدمرنا زمان واحنا صغار الا بنات الجيران !
لما نكون نلعب بالحاره ، بنكون طبيعين وماخدين راحتنا والامور تمام ، اللي شالح ( حفايتو ) واللي لابس شبّاح ورابط بلوزتو ع خصرو ، واللي بصرّخ!

اذا طلعت بنت الجيران عالبرنده ، كانت كل سلوكياتنا تتغير لا اراديًا ،، اللي شالح حفايتو بلبسها ، وابو البلوزه بلبس بلوزتو ، والكل بصير يعرف يلعب ، والكل بصير سريع ، واللي بتلاقيه مشي بالبسكليت وهو مفلّت ايديه ، واللي بصير ( يصمّد ) بالطابة ع راسو ، وفي واحد كان يركض عبيتهم ، يغسل وجهو ويبل شعرو مي ويمشط ويطلع ويضل واقف !!

وفي تنين بصيرو يتباطحو بالحاره قدام بنت الجيران ، او يلعبو كراتيه ، لإظهار القوه ، وفي واحد كان يروح يشتري حبة بوظة ويقعد يوكل فيها قدامها ، وفي واحد يصير يغني ابصر ليش ، واللي بصير يمشي ع طرف الرصيف وهو مادد ايديه ، قال يعني حركة توازن !

واذا كان اخو البنت معنا بالحاره ، كان الكل بدو يبين انو صاحبو ، يجي واحد يحط ايدو ع كتفو ويمشو ، وواحد يعطيه الطابه ويقولو شوت عليي شوت ، واللي ماسك حبة البوظه يمدها عند وجهو ويقلو توكل ؟!
بس في واحد ما بعرف ليش كان يصير ( يعرج ) وهو ماشي قدام بنت الجيران ، ما بعرف ليش حابب يوصللها انو يتألم ، وبس تفوت البنت يرجع يمشي طبيعي ، وفي واحد يسوق فيها الشب الثقيل ، هاد يضل واقف لحالو ، ما يعمل اشي !

ويا حبيبي اذا بنت الجيران مرّت من الحاره رايحه تشتري ، هون بتبلش المواهب ، واحد بصير يرقص اجنبي ، اصلا لو حدا كان معو سلاح يومها ، عليم الله ليطخ خمس رصاصات بالهوى ، واللي بحط الطابه عالارض وبقعد عليها ، واللي بقول وقفو اللعبه وبمسك الطابه مشان تمر البنت!! وفي واحد بالعقل بشوت الطابه شوته خفيفه باتجاه البنت ، بللللكي حنت عليه وشاتتلو الطابه ، اذا البنت نفسيه كانت تطنش وتخلي الطابه تمر من جنبها ، اذا البنت عادي كانت البنت ترجع الطابه للشب شوته خفيفه فكحه ، والشب يلحق الطابه ، وهي تبتسم وتروح ، والكل يصير يتفرج فيه ، وهو قال يشوف حالو انها ضحكتلو!

مع انو بنت الجيران تكون كبيره ، واكبر من الكل ، وشايفه الكل زي اخوانها الصغار ، بس اصلا ما كان في بنات بالحياه ، غير المذيعات ، سوسن تفاحه وعفاف قضماني ، وفي عبير عيسى بالعلم نور ، وعروب صبح ، وبنت الجيران!!

حاليا في اشي تغير مش عارف شو هو بالزبط!!

#ذكريات_حارتنا١
#عمر_زوربا