توضيح عقد زين | عمر زوربا | Omar Zorba

معلومات بسيطة عني :

انا مش كاتب ، ولا صحافي ، ولا مؤثر ، ولا اديب ، ولا مثقف ، ولا عميل ، ولا خاين ، ولا مدسوس ، ولا تابع لأي جهه هدفها غسل ادمغة الشباب ، ولا اقوم بأثراء المحتوى العربي ، ولا الي دخل باللغة العربيه ، اصلا انا فارط اللغة العربيه فرط ، بكتب بالعامية ، بلغة الشارع ، باللغة اللي بفهمها وبحكيها!

هاد بروفايلي شخصي ، بكتب فيه اي اشي بقدر يحكيه اي حدا ، اليوم بكتب عن ارتفاع اسعار الجوافة ، وبكرا عن خاتم خطبة جارتنا!

ما أثرت ع حدا ، ولا عمري حكيت لحدا تعال اعملي لايك ، ولا مشان الله شير ، بس بطلب شير لما انزل بوست عن حالة انسانية ، وما بطلب من حدا يوخد برأيي ، ما عندي فكرة بدي اوصلها لحدا ، مش ضد حدا ولا بكره حدا ، انا ابن اخوى مش قادر أمون عليه و أأثر فيه مشان يرقص وأصورو ، ما عندي مشكله مع اي حد!!

امي عندي اهم اشي بحياتي ، والله يخليلي ياها ويخليلكم امياتكم ، ماشي ع رضاها والحمدلله ، وفي ناس كثير بحبوني انا متأكد من رضى الوالده علي والحمدلله ، وكل اللي بحبني بحطو على راسي من فوق ،،

انا بالعاده ما بهتم للحكي العاطل ، بس في ناس اذا ما شافو اني رديت ، بزيدو الحكي عني !

بس لما امي بالصدفة تدخل تقرأ عالفيسبوك ، وتلاقي حدا بغلط علي ، وحدا بدعي عليي ، وحدا حاقد عليي ،
وتسألني امي ليش يما بسبو عليك؟!
شو اجاوبها؟!

اقولها لإني وقعت عقد شغل مع شركة زين؟!
لانهم كتبو اني اقوم بإثراء المحتوى العربي؟!
ولا لانهم قالو انو انا مؤثر؟!

طب كيف لو وقعت اتفاقية الغاز شو كان صار؟! كان انهدر دمي!
طب لو كتبو ( الكاتب ) عمر زوربا؟! بيجو يطخوني عباب البيت؟!
طب مش عاجبكم انهم كتبو اني مؤثر ، ليش انتو تتأثرو بالحكي؟!

بزبطش اشتغل؟! ما بزبط اخد راتب؟!
طب انتا يا زعلان ، انتا بتدفعلي اجار بيتي؟! انا باخد من جيبتك اشي؟! شو في بالزبط؟!

واللي بقول انا احسن منك ووقعو معك ومعي لأ، طب انا شو دخلني؟! انا وين غلطي؟!
واللي بقول : عمر زوربا يثري المحتوى العربي؟! لماذا؟! ما هذا العار؟!
طب وحد الله يا كبير ، خود نفس ، اي عار واي فضيحه؟ هو انا شلحت اواعيي ع دوار الداخليه؟! طولو بالكو الله يجعلها اكبر المصايب يا عمي ، انا لا بثري المحتوى العربي ولا الي دخل بالعربي ، بس اعتقوني ، ولا بثري ولا ببيع ، ولا الي دخل !

كل الاحترام للجميع ❤️
#توضيح #عقد #زين
#عمر_زوربا