عمر زوربا (شب واقع فاهم الواقع)

يا حرام اللي زمان كانت تحلم تتجوز واحد و بهيك لحظات يكونو قاعدين عسجادة خميله ، وقبالهم fire place ولابسين بلوزتين صوف كمامهم طويله ، وحاملين كل واحد mug فيه نسكافيه بتطلع بخار ، مع اضاءة معتمة ، وصوت الشتا بتكتك عالشباك ، وعلى يمينهم كلب صغير قاعد بتدفى ، وقال جوزها بشوفها بردت ، بقوم بزيد الحطب ، فقال هي بتصير تفكر قديش خايف عليها ، وبنفس الوقت بتشتقلو لانو قام ثواني من جنبها ، وبنفس الوقت بتخاف عليه تطير شراره ع ايدو ، ف بس يرجع قال بتحضنو ، ف هو بحط ايدو ع شعرها بكنفشلها  اياه ، وبتنام ع كتفو ، وقال من الدفى بنامو ، وثاني يوم بصحو لأنو الشمس ( تسللت ) من الشباك ، فهو بصحى و بقوم عالسريع بجيب حرام وبغطيها ، وقال هي بتكون عارفه انو بغطيها بس بتعمل حالها نايمه ، وبقوم قال بشغل غاز الكهربا ، وبشغل ماكنة تسخين المي ، وبشغل اغنية لفيروز ، وبفقس بيضه عالغاز ، الارضيه بتكون سودا ، والبيضه بتنقلى عالسريع ، فهي بتصحى ، وبتشوفو بعمللها فطور ، بتقوم تساعدو ، بتفتح الثلاجه ام اربع بواب ، وبتطول عصير بردقان ، وبتصب نص كاسه وبتشربها ، فهو بتفرج عالساعه ، بترك البيض عالنار ، وبطلع يلبس اواعي...

ما كان مدمرنا زمان واحنا صغار الا بنات الجيران ! لما نكون نلعب بالحاره ، بنكون طبيعين وماخدين راحتنا والامور تمام ، اللي شالح ( حفايتو ) واللي لابس شبّاح ورابط بلوزتو ع خصرو ، واللي بصرّخ! اذا طلعت بنت الجيران عالبرنده ، كانت كل سلوكياتنا تتغير لا اراديًا ،، اللي شالح حفايتو بلبسها ، وابو البلوزه بلبس بلوزتو ، والكل بصير يعرف يلعب ، والكل بصير سريع ، واللي بتلاقيه مشي بالبسكليت وهو مفلّت ايديه ، واللي بصير ( يصمّد ) بالطابة ع راسو ، وفي واحد كان يركض عبيتهم ، يغسل وجهو ويب ل شعرو مي ويمشط ويطلع ويضل واقف !! وفي تنين بصيرو يتباطحو بالحاره قدام بنت الجيران ، او يلعبو كراتيه ، لإظهار القوه ، وفي واحد كان يروح يشتري حبة بوظة ويقعد يوكل فيها قدامها ، وفي واحد يصير يغني ابصر ليش ، واللي بصير يمشي ع طرف الرصيف وهو مادد ايديه ، قال يعني حركة توازن ! واذا كان اخو البنت معنا بالحاره ، كان الكل بدو يبين انو صاحبو ، يجي واحد يحط ايدو ع كتفو ويمشو ، وواحد يعطيه الطابه ويقولو شوت عليي شوت ، واللي ماسك حبة البوظه يمدها عند وجهو ويقلو توكل ؟! بس في واحد ما بعرف ليش كان يصير ( يعرج ) وهو ماشي ...

معلومات بسيطة عني : انا مش كاتب ، ولا صحافي ، ولا مؤثر ، ولا اديب ، ولا مثقف ، ولا عميل ، ولا خاين ، ولا مدسوس ، ولا تابع لأي جهه هدفها غسل ادمغة الشباب ، ولا اقوم بأثراء المحتوى العربي ، ولا الي دخل باللغة العربيه ، اصلا انا فارط اللغة العربيه فرط ، بكتب بالعامية ، بلغة الشارع ، باللغة اللي بفهمها وبحكيها! هاد بروفايلي شخصي ، بكتب فيه اي اشي بقدر يحكيه اي حدا ، اليوم بكتب عن ارتفاع اسعار الجوافة ، وبكرا عن خاتم خطبة جارتنا! ما أثرت ع حدا ، ولا عمري حكيت لحدا تعال اعملي لايك ، ولا مشان الله شير ، بس بطلب شير لما انزل بوست عن حالة انسانية ، وما بطلب من حدا يوخد برأيي ، ما عندي فكرة بدي اوصلها لحدا ، مش ضد حدا ولا بكره حدا ، انا ابن اخوى مش قادر أمون عليه و أأثر فيه مشان يرقص وأصورو ، ما عندي مشكله مع اي حد!! امي عندي اهم اشي بحياتي ، والله يخليلي ياها ويخليلكم امياتكم ، ماشي ع رضاها والحمدلله ، وفي ناس كثير بحبوني انا متأكد من رضى الوالده علي والحمدلله ، وكل اللي بحبني بحطو على راسي من فوق ،، انا بالعاده ما بهتم للحكي العاطل ، بس في ناس اذا ما شافو اني رديت ، بزيدو الحكي عن...

الله يعين البنت بالمناسبات جد ، بدها لكل مناسبة لبسة ، لعيد ميلادها لبسة ، و لبسة لعيد ميلاد صاحبتها ، وبدها لبسة لحفل وداع اخت صاحبتها ، وبدها لبسة لعيد الأم وعيد الشجرة ، ولبسة للجاهة ، ولبسة لخطبتها ، ولبسة للتوقيت الشتوي ، ولبسة لزيارة دار حماها ، وبدها لبسة لتخريج اخت خطيبها ، ولبسة لإجتماع امهات طلاب المدرسة ، ولبسة لمباركة تغريد سلفتها ، ولبسة لصلحة رمزي ع اهل مرتو يوم متمشكل مع اخو مرتو وطردو برمضان بدون اكل ، ولبسة لعيد الاستقلال ، ولذكرى الثورة ، و لبسة لنتائج التو جيهي ، ولبسة لطلعة المول ، ولبسة للمطبخ .. الخ ! الشب بشتري ( بدلة ) يوم تخريجو من الجامعة ، بتخرج فيها ، وبخطب فيها ، وبتجوز فيها ، وبسافر فيها ، وبقابل لوظيفه فيها ، وبنام فيها ، وبتحمم فيها ، وبطلع ع طوشة فيها ، وبسبح فيها ! والمشكله الكل بقولو : اسمع بدلتك خرافيه  👍🏻 اما البنت كل ساعتين لبسة ، وبتقعد تدور ع لبسة ٤ شهور ، وبس تلاقي لبسة حلوه ، بتلبسها ، ثاني يوم صاحبتها بتبعتلها سكرين شوت من محادثه لجروب ( بنات وبس ) مكتوب فيها : عفكره فستان فلانه بخزي بخزي بخزي ! حتى لما يدور عالبدلة بقول لإمو : ...

هبه عاجقة البيت من الصبح ، تعزيل ع تنظيف ع ترتيب ع تغيير اماكن ، غيّرت ملامح غرفة الضيوف كلها ، حطت الكنباية الكبيرة هناك عند الشباك قال احسن ، لأنو حماتها ( بتأرجل ) ، وتقعد عند الشباك احسن!! مهو انا نسيت احكيلكم ، انو خطيب هبة ( عصام ) و امو و اختو عبير جايين اليوم عند اهل هبة ، هيك زيارة مع سهرة خفيفه ، مش عشا مش عشا ، يعني قعدة بطيخ وبزر و ارجيلة وجس نبض !! فرح اخت هبة حلفت ما تساعد هبه ب اشي ، لانها متدايقه انها عزمتهم وهي عندها امتحان بكرا! وام هبة ما عندها مشكله ، اصلا ام هبة طلعت تجيب فواكة من الخضرجي ، موز عشوية تفاح مع كيوي ، وحبة اناناس ( ديكور ) تنحط عالطاولة ! لانو عيب الجماعه جايين اول مره بعد كتب الكتاب! صار في شوية مشاكل بين هبة و فرح ، لانو هبة وهي بتعزل مشغلة المسجل ع اغنية ( نعناعة الجنينة لمحمد منير ) فرح اجت طفت المسجل ، هبة رجعت شغلتو! فرح : هبة بدي ادرس ، بكرا عليي امتحان اهم منك ، ومن خطيبك ، وحماتك ، ومحمد منير تبعك! هبة : انخرسي وروحي ع غرفتك ، انتي ليش غيرانه مني اه؟ ولا لأنو رأفت ما خطبك يا هبله  😂 - فرح خف عقلها ، لانها ذكرتها ب رأفت ، هاد رأ...

دخلت ( هبه ) عالبيت فارعة دارعة ، فتحت الباب مش شايفه قدامها ، ابعدولي ابعدولي ، شافت امها واختها واخوها الصغير حمزة قاعدين بوكلو !! رمت شنتتها عاليمين ، واجت ركاض عالاكل !  هبه : ميته ميته جوع بدي انشّل من الجوع ، دايخه وحياة امي دايخه!! بتبعد اخوها حمزه من كتفو ب ايدها عاليمين ، بميل هو وبتوقع من ايدو المعلقه ! ولك ابعد غاد بدي اكل! هاتي يما خبزة من عندك! امها مصدومة ومتجمده ، طالت خبزه واعطتها وهي صافنه هديك الصفنه  😳 اختها فرح ، بتقول لإمها بالعقل : يما مش المفروض انو هبه كانت معزومه مع خطيبها عالغدا؟! امها : اه ولك ورنيت عليها قبل متيجي و حلفتلي ٣ مليون يمين انو عبّى الطاوله اكل ، وانها اكلت وشبعت! فرح : طب مالها يما شوفي كيف فرمت صحن الرز فرم ، وبتعض عالخبزه زي اللي صارلها سنتين مش ماكله! شو القصه؟! ليكون تمشكلو ؟! امها : لا ولك شو تمشكلو ، والله بدبحها ، الشب منيح وكريم وما رح تلاقي زيو! حمزة صافن ب اختو هبه وبطريقة اكلها ! هبه : حمزه صبلّي بيبسي ! تفرجت ع امها و اختها : يما مالكو ليش صافنين فيي هيك؟! بدكوش اكل؟! امها : لا يما صحتين كلي ، بس يعني لإنو ابصر...